Maqtale Bibi Sakina Lyrics
جب ہو گئے تمام مدگارِ حق شہید
شامِ غریباں چھائی اندھیرا ہوا شدید
خیمے جلانے آگئے سب حامئِ یزید
ایک بچی چاہتی تھی کہ بابا کی کرلوں دید
سہمے ہوئے وہ خیموں سے ڈر کر نکل گئی
بابا کو ڈھونڈنے سوئے مقتل وہ چل پڑی
مقتل میں دی صدائیں کہ بابا کہاں ہو تم
بابا جلا دیا گیا خیمہ کہاں ہو تم
آئی ہے تم سے ملنے سکینہ(س) کہاں ہو تم
آواز دو کہ کچھ نہیں دکھتا کہاں ہو تم
بیٹی کے بین سن کہ وہ بابا نے کی فغاں
بے سر کی لاش نے کہا بیٹی ہوں میں یہاں
مقتل میں بابا لاشے ہیں بکھرے پڑے ہوئ
تیرے مجاہدین نے کتنے ستم سہے
سینے پہ تیر بھالے ہیں اور سر کٹے ہوئے
کس طرح سارے لاشے ہی پامال ہوگئے
لاشوں پہ بابا جان گئی جب میری نظر
دل بیٹھنے لگا میرا لگنے لگا ہے ڈر
اکبر(ع) کہاں ہے بابا بتاؤ نا تم مجھے
لاشہ کہاں ہے اس کا بتاؤ نا تم مجھے
پوچھے گی مجھ سے صغریٰ(س) بتاؤ نا تم مجھے
کیسے گیا وہ مارا بتاؤ نا تم مجھے
ڈھونڈونگی اس کو کیسے میں لاشوں کے درمیاں
میں نے سنا ہے سینے میں اس کے لگی سناں
بابا بتاؤ نا میرا بھیا کہاں گیا
میرا غریب گھٹنیئوں والا کہاں گیا
بابا وہ تین روز کا پیاسا کہاں گیا
ظالم نے جس کو تیروں سے مارا کہاں گیا
وہ مر گیا ہے اس کا تو جھولا بھی جل گیا
بابا بتاؤ دفن اسے ہے کہاں کیا
مشکیزہ مجھ سے لے کے گئے تھے مرے چچا
مجھ سے کہا تھا دریا سے پانی میں لاؤں گا
بابا مجھے بتائیے ایسا بھی کیا ہوا
بابا بتائیں کیسے وہ مشکیزہ چھد گیا
کس طرح ان کو تیر لگے بازو کٹ گئے
کیسے بغیر ہاتھوں کے وہ زین سے گرے
کرب و بلا کا دشت ، اندھیرا تھا چار سو
بچی لپٹ کے کرتی تھی بابا سے گفتگو
بابا کا درد کم ہو یہ تھی اس کی آرزو
ہائے ستم کہ آگئے مقتل میں پھر عدو
ظالم نے اس یتیمہ پہ ظلم و جفا کِیا
زلفیں پکڑ کے لاشِ پدر سے جدا کِیا
___________________________
Soaz Khuwan | Saleem Mastan wa Bradran
Shair e Ahlebait | Syed Aimaad Naqvi
Audio Record | Saiban Studio
Arrangement & Mixing | Studio 92
Chorus | Saleem Mastan wa Bradran
Samajh Ke Zahra Sataya Gaya Sakina Ko Lyrics
