Muharram Kareeb Hai
فرشِ عزا بچھاو محرّم قریب ہے
دل کربلا بناو محرّم قریب ہے
۔۔۔۔۔(١)۔۔۔۔۔
تشہیر کے لیے کوئی پرچہ اگر چھپے
القاب اور خطاب کا میلہ نہیں لگے
مجلس کے اشتہار کی یہ زیب و زین ہو
سب سے بڑا لکھا ہُوا نامِ "حسینؑ" ہو
۔۔۔۔۔(٢)۔۔۔۔۔
پیشِ امامِ وقتؑ یہ وعدہ بھی ہو وفا
وقتِ مقرّرہ پہ ہو مجلس کی ابتدا
موجود ہو نہ کوئی مگر سیّدہؑ تو ہیں
حاضر عزا کے فرش پہ آلِ عباؑ تو ہیں
۔۔۔۔۔(٣)۔۔۔۔۔
جوتوں کے ساتھ جھوٹی انا بھی اتاریے
پھر اس کے بعد فرش پہ تشریف لائیے
ہم قدر و ہم مراتب و ہم سر ہے ہر شریک
فرشِ عزا پہ ایک برابر ہے ہر شریک
۔۔۔۔۔(۴)۔۔۔۔۔
آپس میں بات چیت سے رکھنا ہے خود کو دور
نورِ کساء کا ہوتا ہے اِس فرش پہ ظہور
دورانِ ذکر ہو نہ کسی شخص سے کلام
خاموش ہو عوام کہ موجود ہیں امامؑ
۔۔۔۔۔(۵)۔۔۔۔۔
مجلس میں بالخصوص کیا جائے اہتمام
مہمانِ خاص کوئی نہیں ہو بجز امامؑ
کتنا بڑا ہی شخص ہو لیکن میرے عزیز
مولاؑ سے بڑھ کے کوئی نہ ہم کو رہے عزیز
۔۔۔۔۔(٦)۔۔۔۔۔
منبر پہ لائیں عِلم و فضیلت کے خوش مقال
بُننے نہ دیجے جہل کو دجّالیت کے جال
فرشِ عزا ہے دہر میں دفتر امامؑ کا
تیّار اِس نے کرنا ہے لشکر امامؑ کا
۔۔۔۔۔(٧)۔۔۔۔۔
لاریب یہ عقیدہ ہو ہر خاص و عام کا
فرشِ عزا ہے خیمہء نصرت امامؑ کا
اِس بار ہم جو خیمہء نصرت میں آئیں گے
اپنے امامِ وقت کے حرؑ بن کے جائیں گے³
۔۔۔۔۔(٨)۔۔۔۔۔
نوحوں کی حق بیانی سے جرات کشید کے
ہر اٹھتا ہاتھ جائے گا منہ پر یزید کے
ہوگا جنازہ فکرِ ولید و پلید کا
ماتم کی صف کرے گی صفایا یزید کا
۔۔۔۔۔(٩)۔۔۔۔۔
ماتم کے بعد آئے جو ساعت سلام کی
کرنی ہے سر جھکا کے زیارت امام کی
غُل ہو نہ اختتام پہ کچھ شور و شین کا
مجلس میں بانٹا جائے تبرّک حسینؑ کا
۔۔۔۔۔(١٠)۔۔۔۔۔
بوذؔر خلوصِ دل سے دعا مانگیے حضور
اِمسال مجلسوں میں نظر آئے ایسا نور
شاہؔد کہیں امامِ زمانہؑ، قبول ہے
اہلِ عزا کا گریہ و پرسہ قبول ہے
